जोतिबा डोंगरावर परत फुलणार आता 'तो' चाफेबन...

जोतिबा डोंगर - महाराष्ट्र,कर्नाटक, गुजरात, आंध्रप्रदेश या राज्यातील लाखो भाविकांचे श्रद्धास्थान असणाऱ्या श्री क्षेत्र वाडी रत्नागिरी तथा जोतिबाचा डोंगर ता.पन्हाळा या ठिकाणी असणाऱ्या यमाई मंदिर परिसरात आता चाफेबन फुलणार असून यासाठी दख्खन केदार सोशल फाऊंडेशनने पुढाकार घेतला आहे. त्यांनी यमाई मंदिर परिसरात ४०० चाफा झाडांचे वृक्षारोपन केले. त्या बरोबरच आंबा,जांभळ, जास्वंद तसेच इतर फुलझाडे लावलीत.

या फाउंडेशनने या मोहीमेस सुंदर चाफेबन मोहीम हे नाव दिले असून या मोहिमे अंतर्गत यमाई मंदिर परिसर स्वच्छता, परिसर शुशोभिकरण प्राचीन असे जमदग्नी तीर्थ यांचेही संवर्धन केले जाणार असून चाफेबनामुळे आता यमाई मंदिराला शोभा येणार आहे. चैत्र यात्रेला येणाऱ्या भाविकांना ही चाफे बनातून आनंदाने बागडता येणार आहे .
 श्री जोतिबा डोंगरावरील यमाई मंदिर परिसरात पूर्वी मोठे असे चाफेबन होते. या ठिकाणी मोठ्या प्रमाणात चाफ्याची झाडे होती. या फुलांचा सुंगधाने परिसर सुंगंधी व्हायचा. चाफ्याची फुले वेचण्यासाठी गर्दी व्हायची. त्यामुळे हा परिसर सुंदर व देखणा असा होता.

वाचा - जोतिबा डोंगरावर वर्षा पर्यटनासाठी 'हे' खास पाॅईंट पण यंदा कोरोनाने प्लॅन फसला...

काळाच्या ओघात यमाई मंदिर परिसरात चाफेबन नामशेष झाले.त्याचे एक ही झाड पाहण्यासाठी शिल्लक राहिले नाही.याच चाफेबन परिसराला पुनर्वैभव प्राप्त करण्याचा विचार जोतिबा वरील केदार विजय ग्रंथ अभ्यासक सुनील अमाणे यांना पडला. त्यांनी या सोशल फाउंडेशनच्या मंडळींशी याबाबत आपले मत मांडले आणि फाउंडेशन मधील मंडळींनी यास तात्काळ सन्मती दिली आणि चाफेबन करण्याचा निर्णय झाला.

त्यानुसार कोकण, शाहूवाडी, वारणानगर परिसरातून चाफे झाडे उपलब्ध केलीत. कालच जोतिबाची उपसरपंच शिवाजीराव सांगळे यांच्या हस्ते या मोहीमेस प्रारंभ झाला. यावेळी दख्खन केदार सोशल फौडेशनचे सुनिल आमाने,अमित मिटके,रोहीत संभाजी मिटके,सागर जाधव,केदारनाथ पवार,राहुल खडके,उदय पाटील,महेश बनकर,वैभव झुगर,प्रमोद भिवदर्णे आदी उपस्थीत होते .

दख्खन केदार सोशल फोंडेशनच्या माध्यमातून आम्ही जोतिबा डोंगरावर यमाई मंदिर परिसरात चाफेबन करण्याचा निर्धार केलाय.चाफेबनाला वैभव प्राप्त करण्यासाठी आम्ही झटणार आहोत.

- राहूलकुमार  खडके
(कराड) फोंडेशन सदस्य